युवा जागृति कार्यक्रम सम्पन्न

नेपाली ख्रीष्टियन युवा मञ्चको आयोजनामा गत बैशाख १ गते, नयाँ वर्ष २०७५ सालको अवसर पारेर उपत्यकामा एक युवा जागृति कार्यक्रम सम्पन्न गरेको छ । सो कार्यक्रममा शुरुको प्रार्थना पा. रोहित ढकालले गर्नुभएको थियो भने स्तुतिप्रशंसाको अगुवाई गायक राजेश राईले गर्नुभएको थियो । गायक राईले गर्भ पतनको बारेमा आमा… बोलको गीतले धेरैको आँखा रसाएको थियो । गायिका सविना सुनुवारले हे युवा…. गीत गाएर सबैलाई उत्साहित पार्नुभएको थियो । सो कार्यक्रम कुमार अब्राहामले संचालन गर्नुभएको थियो ।

सो युवा मञ्चका उपाध्यक्ष समय कुमारले युवा मञ्चको बारेमा बोल्दै युवाहरु मण्डलीका खम्बाहरु हुन भन्दै युवाहरुलाई उत्साह दिनुभएको थियो । विनिता मगरले नृत्य प्रस्तुति दिनुभएको थियो । यस्तै मोर प्रेयर मोर पावर ग्रुपले आफ्नो दमदार प्रस्तुति पस्कनु भएको थियो साथै विवोइङ डान्स ग्रुपको प्रस्तुतिले दर्शकहरुलाई मनोरञ्जन दिनुभएको थियो । पा.डा.मंगलमान महर्जनले परमेश्वरको वचनबाट सिकाउनु भएको थियो । उहाँले युवाहरुले कसरी विश्वासलाई विभिन्न क्षेत्रमा जोगाउने विषयमा सरल प्रकारले सिकाउनु भएको थियो ।

सह–अध्यक्ष भुवन देवकोटाले युवाहरुले बिभिन्न ७ क्षेत्रमा कसरी कार्य गर्नु पर्दछ भन्ने बारेमा सरल प्रकारले सिकाउनु भएको थियो । हामी येशूका अनुयायी युवाहरु कसरी नून र ज्योति बन्ने भन्ने बारेमा विभिन्न ७ क्षेत्र अन्तगर्त व्यापार, प्रशासन, संचार, कला–साहित्य, शिक्षा, परिवार र धर्मको बारेमा विस्तृत रुपमा सिकाउनु भएको थियो । सो कार्यक्रममा बिभिन्न चर्चहरुबाट ५ सयभन्दा वढीको सहभागिता रहेको थियो । अन्तमा विश्वास थापाले धन्यवाद दिइ सो कार्यक्रम सम्पन्न भएको थियो ।