एन.सि.एफ. नेपाल प्रदेश नम्बर २ को भेला तथा परिचयात्मक कार्यक्रम सम्पन्न

२०७५ माघ ४ गते, ख्रीष्टियन खबर सम्वाददाता । एन.सि.एफ. नेपाल प्रदेश २ को युवा समितिको आयोजनामा गत माघ १ गते सर्लाहीको सुके पोखरीस्थित अनन्त जीवन मण्डलीमा प्रदेश नम्बर २ मा रहेको एन.सि.एफ. नेपालका सदस्य मण्डलीहरूका पास्टर तथा युवा अगुवाबिच परिचयात्मक कार्यक्रम सहितको एकदिने कार्यक्रम सफलतापूर्वक सम्पन्न भएको खबर प्राप्त भएको छ ।

प्रदेश नम्बर २ का अध्यक्ष नेमा लामाको प्रमुख आतिथ्य र प्रदेश – २ युवा समितिका अध्यक्ष सुनिल तामाङको अध्यक्षतामा सम्पन्न भएको उक्त कार्यक्रमका वक्ता पास्टर आशिष लामा हुनुहुन्थ्यो । प्रदेश नम्बर २ मा रहेका एन.सि.एफ. नेपालका सदस्य मण्डली र अन्य मण्डलीहरूका पास्टर तथा युवा अगुवाहरूको बाक्लो उपस्थिति रहेको उक्त कार्यक्रम विशेष गरी युवाहरूमाझ प्रभावकारी सेवकाइ गर्न र गराउन संगति र सम्बन्ध विस्तार गर्ने उद्देश्यले सम्पन्न गरिएको थियो । साथै प्रत्येक जिल्लामा संयोजन समितिहरू पनि गठन गरिएको थियो ।

विकाश थापाले सञ्चालन गर्नुभएको उक्त कार्यक्रममा एन.सि.एफ. नेपालका केन्द्रीय युवा समितिका अध्यक्ष श्री लाजरस तामाङले एन.सि.एफ. नेपाल युवा सेवकाइको दर्शन र उत्साहका वचनद्वारा सहभागीहरूलाई उत्साह दिनुभएको थियो ।