‘हामी सबै’ नामक ख्रीष्टियन म्युजिक भिडियो विमोचन

काठमाडौं, १० डिसेम्बर २०२१ । होसन्ना चर्च मिनिष्ट्रिज काठमाडौंले आफ्नो २५औं रजत महोत्सवको अवसर पारेर पास्टर राजु सुन्दास र पास्टर राजेन्द्र सुन्दासद्वारा निर्माण गरिएको ‘हामी सबै’ नामक एक ख्रीष्टियन म्युजिक भिडियो हिजो काठमाडौंको दरबारमार्गस्थित राइजिङ मलमा अवस्थित क्यु’एस सिनेमा हलमा एक समारोहकाबिच विमोचन गरिएको छ ।

म्युजिक भिडियोका चर्चित कलाकार सुधिर श्रेष्ठ, उषा उप्रेती, विना रावत र सरोज प्रजा फिचरेड सो म्युजिक भिडियो विमोचन समारोहमा भिडियो निर्माणकर्ताहरूका आफ्नै आमाबुबा बरिष्ठ पास्टर ज्ञानु सुन्दास र गुरुआमा मार्था सुन्दास प्रमुख अतिथि हुनुहुन्थ्यो । भक्तपुर ख्रीष्टियन समाजका अध्यक्ष पास्टर पासाङ तामाङले शुरुको प्रार्थना गरि शुरु भएको सो कार्यक्रममा योङ्गिता लामाले सहभागीहरूलाई स्वागत मन्तब्य राख्नुभएको थियो । त्यस लगत्तै पास्टर राजु सुन्दासले सङ्गीतको महत्वमाथि प्रकाश पार्दै आफूहरूले पछिल्लो समयमा किन म्युजिक भिडियो निर्माण गरिरहेको हो भन्ने कुरामाथि चर्चा परिचर्चा गर्नुभएको थियो ।

पास्टर ज्ञानु सुन्दासबाट म्युजिक भिडियो उद्घाटन भएलगत्तै पत्रकार तथा फिल्म स्क्रीप्ट राइटर विकास सुवेदीले विशेष मन्तब्य राख्नुभएको थियो भने इम्पाक्ट जेनेरेसन मिनिष्ट्रिका शामुएल तामाङले आफ्नो छोटो मन्तब्य राखेर समपर्णको प्रार्थना गर्नुभएको थियो । गायिका सलोमी तिमोथी, ज्योतिको घर नेपालका अध्यक्ष विजय लामा, डुनामिस चर्चका पास्टर तथा गोकर्ण सामुदायिक समाजका अध्यक्ष राजु लामा, युवा दर्शन पत्रिकाका प्रकाशक तथा ख्रीष्टियन खबरका सञ्चालक पत्रकार दिनेश श्रेष्ठ, लिडिया लामा लगायतले यस म्युजिक भिडियोको सफलताको शुभकामना मन्तब्य दिनुभएको थियो ।

सुष्मा लामाद्वारा सञ्चालन गरिएको सो कार्यक्रमको अन्त्यमा यस कार्यक्रमका कोअडिनेटर राजिव शाहले विशेष सूचनाहरू राख्नु हुँदै धन्यवादका शब्दहरू राख्नु भएको थियो । त्यसपछि पास्टर हरि तामाङले अन्तिम प्रार्थना गर्नुभएपछि सो भिडियो विमोचन कार्यक्रम सम्पन्न भएको थियो ।

एचसिएम नेपालको युटुब च्यानलबाट रिजिल भएको सो म्युजिक भिडियोमा जस्मिन एभरेष्टको शब्द रहेको छ भने चर्चित सङ्गीतकार सुवास भुसालले संङ्गीत भर्नुभएको छ । गायिका सुष्मा विश्वकर्मा र गायक देवेन्द्र बरालले स्वर दिनुभएको सो गीतलाई पुरुषोत्तम सुवेदीले एरेञ्ज गर्नुभएको हो भने कोरियोग्राफी र निर्देशन रामजी लामिछानेले गर्नुभएको छ ।

स्मरण रहोस् उक्त भिडियो विमोचन कार्यक्रममा पास्टर राजु सुन्दासको आफ्नो अफिसियल राजु सुन्दास अफिसियल नामक युटुब च्यानल उहाँकी धर्मपत्नी समिता सुन्दासले उद्घाटन गर्नुभएको थियो ।