असल छिमेकी नेपाललाई ग्लोबल एन.जि.ओ. लिडरसिप एक्सेलेन्स अवार्ड

पोखरा । पोखरेली ख्रीष्टिय समुदायको पहलमा स्थापना भएको असल छिमेकी नेपाल ग्लोबल एनजिओ लिडरसिप एक्सेलेन्स अवार्डबाट गत फेव्रुअरी १८ तारिख २०२० मा भारतको मुम्वईमा सम्मानित भएको खबर प्राप्त भएको छ ।

गत १८ फेव्रुअरीका दिन मुम्बईको ताजल्याण्डस्थित ५ तारे रिसोर्टमा आयोजिक अभिमुखीकरण तथा अवार्ड वितरण कार्यक्रममा पोखरेली ख्रीष्टिय समुदायका अध्यक्ष हरिराम घिमिरे, असल छिमेकी नेपालका अध्यक्ष भरतबहादुर गुरुङ, कार्यकारी निर्देशक राजु अधिकारी र सहकर्मी दिनेश के.सी. सहभागी भई अवार्ड ग्रहण गरेका थिए ।

सोसियल रेस्पोन्सीविलिटी (सामाजिक उत्तर दायित्व) अन्तर्गत विशेष योगदान पुर्याएर दिगो विकासका लक्ष्य २०३० हासिल गर्न गरिवी निवारण, स्वास्थ्य प्रवद्र्धन, वातावरण संरक्षण जस्ता क्षेत्रमा विशेष योगदान पुर्याउने प्राइभेट तथा सामाजिक संघसंस्था तथा व्यक्तिहरूलाई वल्र्ड सि.एस.आर. कंग्रेस एण्ड अवार्डसले विभिन्न विधामा वर्षेनी सम्मान गर्ने गर्दछ । विपद्बाट प्रभावित तथा विपन्न र सीमान्तकृत समुदायको हितमा उल्लेखनीय काम गरेकोले असल छिमेकी नेपाल पनि एन.जि.ओ. लिडरसिप एक्सेलेन्स अवार्डका लागि छनोट भएको थियो ।

असल छिमेकी नेपाल वि.सं. २०५९ सालमा स्थापना भई नियमित कार्यक्रमतर्फ समुदाय सशक्तीकरण, जीविकोपार्जन, स्वास्थ्य प्रवर्धन, बाल संरक्षण, मानव बेचविखन विरुद्धको अभियान र लागूऔषध तथा रक्सीको समस्यामा परेका महिलाहरूका लागि उपचार तथा पुनस्र्थापना कार्यक्रमहरू कास्की तथा नवलपरासीका सीमान्तकृत समुदायको बिचमा सञ्चालन गर्दै आएको छ । यसरी नै विपद् प्रतिकार्य तर्फ सन् २०१२ को सेती नदीको बाढी प्रभावितहरूलाई राहत र पुनस्र्थापनाका लागि सहयोगदेखि लिएर सन् २०१५ को गोरखा भूकम्पबाट प्रभावितहरूका लागि करिव १० जिल्लामा राहतका कार्यक्रम सञ्चालन गर्नुका साथै पुननिर्माण अन्तर्गत ५ वटा स्वास्थ्य चौकी, ३ वटा गाउँघर क्लिनिक, ३ वटा प्राथमिक विद्यालय भवन, एउटा उच्च मा.वि. भवन सहित करिव १००० जनालाई विभिन्न प्राविधिक तालिम, पुनस्र्थापना कार्यक्रम अन्तर्गत विभिन्न तालिम तथा सहयोग कार्यक्रमहरू सञ्चालन गरिआएको छ । वि.सं.२०७५ को वर्षातको पहिरो प्रभावित पर्वत जलजला गाउँपालिकाका २२ परिवारहरूको घर निर्माण गरी हस्तान्तरण गर्नुका साथै गत वर्ष बर्षातका कारणले प्रभावित बारा, पर्सा तथा रौतहटमा राहत प्रदान गर्नुका साथै रौतहटमा स्वास्थ्य तथा खानेपानीका क्षेत्रमा पनि काम गरिरहेको छ ।

संस्थाका लक्षित लाभग्राही, पोखरेली ख्रीष्टिय समुदायको आड, दातृ निकायको सहयोग, सहकर्मीहरूको अथक परिश्रम, सरकारी तथा गैरसरकारी निकायको समन्वय र सहजीकरण सहित प्रत्यक्ष र परोक्षरुपमा सहयोग पुर्याउने सबैको योगदानले नै यो सम्मान सम्भव भएको हुँदा उहाँहरू सबै पक्ष यसका लागि भागीदार भएको भन्दै कार्यकारी निर्देशक राजु अधिकारीले आभार ब्यक्त गर्नुभएको छ ।

कमल पोखरेली