ख्रीष्टमस विशेष महोत्सव नेपाल टेलिभिजनबाट प्रत्यक्ष प्रसारण हुँदै

काठमाडौं, २०७६ पुस ७ गते । आगामी डिसेम्बर २५ तारिख अर्थात पुस ९ गते ख्रीष्टमसका दिन सारा चर्च र राष्ट्रिय ख्रीष्टियन संस्कृति अध्ययन तथा विकास प्रतिष्ठानको संयुक्त आयोजनामा काठमाडौंको सुकेधारास्थित एक पाटी प्यालेसमा ख्रीष्टमस विशेष महोत्सव कार्यक्रम हुन गइरहेको जनाइएको छ ।

सो कार्यक्रम डिसेम्बर २५ तारिखका दिन बिहान ११ः०० बजेदेखि शुरु हुन लागेको र नेपाल टेलिभिजनबाट प्रत्यक्ष प्रसारण बिहान ११ः३० बजेदेखि २ः०० बजेसम्म हुन गइरहेको कुरा यस कार्यक्रमका संयोजक रेभ.डा. तेज बहादुर रोक्काले हाम्रा सम्बाददातालाई बताउनु भएको छ । यस ख्रीष्टमस विशेष महोत्सव कार्यक्रमका आयोजकले दिनु भएको जानकारी अनुसार विभिन्न विशिष्ट व्यक्तित्वहरूलाई यस कार्यक्रममा निमन्त्रणा गरिएको छ । भने देश तथा विदेशमा रहनु भएका सम्पूर्ण नेपाली भाषी दाजुभाइ तथा दिदीबहिनी सबैलाई नेपाल टेलिभिजन मार्फत प्रत्यक्ष प्रसारण हेरिदिनु हुन अनुरोध समेत गरिएको छ ।

साथै नेपालका विभिन्न एफएम स्टेशनबाट आगामी जनवरी एक तारिखसम्म सारा मिसनको प्रस्तुति कार्यक्रम ‘सफल यात्रा’ मार्फत ख्रीष्टमस विशेष कार्यक्रम सञ्चालन भइरहेको र आगामी डिसेम्बर २४ र २५ तारिखका दिन नेपाल टेलिभिजन, टिभी टूडे, प्राइम टाइम टिभी मार्फत विभिन्न समयमा पनि कार्यक्रम प्रसारण हुन गइरहेको कुरा रेभ. डा. तेज बहादुर रोक्काले बताउनुभएको छ ।