प्रथम नेपाली ख्रीष्टियन फिल्म फेस्टिबल भोलि हुँदै

२०७६ भाद्र ६ गते, काठमाडौं । डुलोस मिडियाको आयोजनामा भोलि भाद्र ७ गते तदानुसार २४ अगष्ट शनिवारका दिन ललितपुरको बालकुमारीस्थित म्युजिक सिटीमा दिउँसो २ः०० बजेदेखि प्रथम नेपाली ख्रीष्टियन फिल्म फेस्टिबलको आयोजना गरिएको छ ।

सो फिल्म फेस्टिबलमा विभिन्न सन्देश बोकेका छोटो ख्रीष्टियन चलचित्रहरू देखाइने कार्यक्रम रहेको आयोजकले बताएको छ । विभिन्न ब्यक्ति तथा समुहहरूले निर्माण गरेका छोटो चलचित्र आयोजकलाई प्राप्त भइसकेको जानकारी प्राप्त भएको छ । यसका साथै ख्याति प्राप्त गायक गायिका तथा कलाकारहरूले मनोरञ्जनात्मक कार्यक्रमका साथै अन्य कार्यक्रम पनि रहेको बताइएको छ ।

५०० जना भन्दा बढी सहभागी हुने आयोजकले विश्वास लिएको यस फिल्म फेस्टिबलमा सहभागी हुन चाहनेले कार्यक्रम स्थलमा पनि टिकट लिन सक्ने र प्रत्येक टिकटको रु. १०० रहेको आयोजकले जनाएको छ । स्मरण रहोस्, नेपाली ख्रीष्टियन इतिहासमा नै यो पहिलो फिल्म फेस्टिबल हो ।