अन्तर्राष्ट्रिय नेपाली ख्रीष्टियन मिडिया नेटवर्क अमेरिकामा बैधानिक रुपमा हालै दर्ता

काठमाडौं, २०७६ असार ३१ गते। अन्तर्राष्ट्रिय नेपाली ख्रीष्टियन मिडिया नेटवर्क अमेरिकी सरकारमा हालै दर्ता भई यसले बैधानिकता पाएको खबर प्राप्त भएको छ ।

नेटवर्क दर्ता भएपछि अमेरिकामा यसले बैधानिकता पाएको छ भने नेटवर्कले आफ्नो लक्ष्य प्राप्तिका लागि तय गरेका कार्यक्रमहरू सहज रुपमा पूरा गर्न बाटो खुल्ला भएको छ । मिडिया नेटवर्क दर्ता भएसँगै अमेरिकामा यस नेटवर्कको नाममा बैंक खाता पनि भर्खरै खोलिएको जानकारी अध्यक्ष दियालीले गराउनु भएको छ । अब देश/विदेशबाट सञ्जाललाई आर्थिक सहयोग गर्न चाहनुहुनेहरूले सहजै रुपमा नेटवर्ककै नाममा सहयोग पठाउन सक्नुहुने भएको छ ।

गत सोमबारका दिन अमेरिकी समयअनुसार अमेरिकाको ओहायो राज्यमा बैधानिक रुपमा मिडिया नेटवर्क दर्ता भएको हो । यस नेटवर्कलाई अमेरिकामा दर्ता गर्नका लागि नेटवर्कका अध्यक्ष अब्राहाम दियालीले पहल गर्नुभएको हो । साथै अमेरिकाबाट कोषाध्यक्षमा नियुक्त हुनुभएका पास्टर सुवास विश्वाले उहाँले गर्नु भएको पहलमा सहयोग गर्नु भएको छ । यस मिडिया नेटवर्कलाई पूर्ण बैधानिकता दिनका लागि दुई वटा खुड्किलो रहेकोमा पहिलो र महत्वपूर्ण चाहिँ सरकारसँगको दर्ता हो, जुन कार्य भर्खरै सम्पन्न भएको छ । दोस्रो खुड्किलो चाहिँ आइआरएस (Internal Revenue Services) सँगको दर्ता हो, जुन सरकारसँग दर्ता भएपछि प्रक्रिया अघि बढ्छ । यो प्रक्रिया पनि चाँडै सम्पन्न गरिने कुरा अध्यक्ष अब्राहाम दियालीले जानकारी गराउनु भएको छ ।

अमेरिकी सरकारसँगको दर्तासँगै दोस्रो खुड्किलो अथवा IRS सँगको दर्ता अर्को महत्वपूर्ण खुड्किलो हो । जसमा दर्ता भएपछि अमेरिकाभरि नेटवर्कले केही सामान खरिद गर्दा कर लाग्ने छैन भने अमेरिकामा ठूलो रकममा कसैबाट आर्थिक सहयोग लिनका लागि कुनै पनि संस्था IRSसँग दर्ता भएको हुनु पर्ने प्रावधान छ । IRS सँग दर्ता भएको संस्थालाई अमेरिकामा मानिसहरूले उत्साहित रुपमा आर्थिक सहयोग गर्ने गर्दछन् ।

अन्तर्राष्ट्रिय नेपाली ख्रीष्टियन मिडिया नेटवर्क अमेरिकामा दर्ता भएसँगै यस नेटवर्कलाई मिल्ने सुविधाका साथ साथै यस नेटवर्कको कार्यसमितिमा रहनु हुने सबैको दायित्व पनि अझै बढेको महशुस गरिएको छ ।