नेपाल ख्रीष्टियन समाजले सरकारको ध्यानाकर्षण गरायो…

पछिल्लो समयमा विकसित परिस्थितिलाई मध्यनजर गर्दै नेपाल ख्रीष्टियन समाजको एक प्रतिनिधिमण्डलले हालैका दिनहरूमा उपराष्ट्रपति नन्दबहादुर पुन, सभामुख कृष्णबहादुर महरा, नेपाल सरकारका गृहमन्त्री रामबहादुर थापा र कानुनमन्त्री शेरबहादुर तामाङलाई भेटी ध्यानाकर्षण पत्र बुझाएको खबर छ । धर्मनिरपेक्ष राष्ट्रमा ख्रीष्टियनहरू लगायत सबैलाई स्वतन्त्ररूपमा धार्मिक अभ्यास गर्न दिइनुपर्ने माग राख्दै सो प्रतिनिधिमण्डल उच्चपदस्थहरू कहाँ पुगेको थियो ।

प्रतिनिधिमण्डलले डेबिट तामाङको नाममा आएको झुटो विज्ञप्तिको बारेमा गृहमन्त्री थापाको गम्भीर ध्यानाकर्षण गराएको थियो । अफवाह फैलाएर ख्रीष्टियनहरूलाई अपराधी सावित गर्दै धार्मिक हिंसा भड्काउने उद्देश्यका साथ आएको यस्तो विज्ञप्ति लेख्ने मान्छेलाई यथासिघ्र कानुनको दायरामा ल्याउन पनि प्रतिनिधिमण्डलले नेपाल सरकारसमक्ष माग गरेको थियो । यसका साथै पूर्वको विराटनगरमा घटेको गोलीकाण्डलाई लिएर सुनियोजित तरिकाले ख्रीष्टियनहरूलाई दोष लगाउने काम भएको प्रति पनि नेपाल सरकारको ध्यानाकर्षण गराइएको जनाइएको छ ।

नेपाल ख्रीष्टियन समाजका उपाध्यक्ष कुबेर गुरुङको नेतृत्वमा गएको प्रतिनिधिमण्डलमा समाजका महासचिव डिल्लीराम पौडेल, सचिव मुकुन्द शर्मा, विपी खनाल, राम देवकोटा, अशोक प्रधान, अधिवक्ता गणेश श्रेष्ठ लगायतका व्यक्ति हुनुहुन्थ्यो ।