सुसमाचार तथा इष्टर महोत्सव २०७४ आयोजना गरिदै

काठमाडौं, चैत्र ४, २०७४। विश्वव्यापी रुपमा स्वीकार गरिदै आएको एउटा सत्य घटना येशू ख्रीष्ट मृत्युबाट तेस्रो दिन आइतबारका दिन चिहानबाट जीवित हुनुभएको हो । जुन घटनालाई इष्टर सन्डे अर्थात येशू ख्रीष्टको पुनरूत्थान महोत्सव भनेर मनाउने गरिन्छ ।

येशू ख्रीष्टमा विश्वास गर्नेहरूले येशू ख्रीष्‍ट मृत्युबाट पुनरुत्थान हुनुभएको घटनालाई संसारभरि सबै मानिसहरूलाई सुनाउने काम गर्दछन्। येशूमा विश्वास गर्नेहरूले उद्धार, मुक्ति र अनन्त जीवन पाउने कुरा विश्वमा रहेका विभिन्न भाषा, जाति क्षेत्रका चर्चहरूले प्रचारप्रसार गर्दै आएका छन् । जसरी ख्रीष्ट येशू पुनरुत्थान हुनुभयो र जीवितै स्वर्ग उचालिनुभयो, त्यसैगरी येशू ख्रीष्ट फेरि यस संसारमा आउँदै हुनुहुन्छ भनि बाइबलले सन्देश दिन्छ ।

यही शुभअवसरमा काठमाडौं उपत्यकाका चर्चहरू र डीसिएमआइ, नेपालको आयोजनामा आगामी चैत्र १९ र २० गतेका दिनहरूमा सुसमाचार तथा इष्टर महोत्सव २०७४ जावलाखेल सेन्ट जेभियर्स मैदानमा भव्यरुपमा मनाउने कार्यक्रम रहेको छ । सोही अवसरमा राजधानीमा भएका चर्चका सम्पूर्ण विश्वासीहरूलाई आफ्ना छिमेकीहरूकासाथ सहभागी हुन आयोजक समितिले हार्दिक निमन्त्रणा गरेको छ ।