वर्ड एण्ड लाइफ युवा सम्मेलन हुँदै

ख्रीष्टियन खबर न्युज

काठमाडौं, २ फागुन ०७४ । काइनोसिस मिनिष्ट्री नेपाल र वर्ड एण्ड लाइफ मिनिष्ट्री अमेरिकाको आयोजनामा राजधानी काठमाडौंको पुतलीसडकस्थित वेथशालोम चर्चमा आगामी फागुन ४ गते शुक्रबारका दिन एक दिने युवा जागृति वर्ड एण्ड लाइफ युवा सम्मेलन आयोजना हुँदैछ ।

सम्मेलनमा प्रमुख वक्ताको रुपमा वर्ड एण्ड लाइफ चर्च अमेरिकाका वरिष्ठ पास्टर विनय भण्डारी हुनुहुन्छ । पास्टर भण्डारीले नै युवाहरूलाई यो चिल झैं उड्ने समय…हो भन्ने विषयमा वचन प्रचार गर्नु हुनेछ । उहाँ अमेरिकाको पेनसिलभिनियास्थित वर्ड एण्ड लाइफ मिनिष्ट्रीका प्रमुख, वर्ड एण्ड लाइफ बाइबल स्कूलका प्रिन्सिपल र नेपालस्थित वर्ड एण्ड लाइफ रेडियो कार्यक्रमका प्रस्तोता पनि हुनुहुन्छ ।

त्यसैगरी यो सम्मेलनमा अर्का वक्ताका रुपमा भारतस्थित पावर एण्ड लभ मिनिष्ट्रीका प्रमुख अपोस्टल सलिम शैख पनि हुनु हुनेछ । उहाँले पनि सम्मेलनमा वचन प्रचार गर्नु हुने जनाइएको छ ।

सो सम्मेलनका संयोजक पास्टर रोहित ढकालका अनुसार बिहान आठ बजेदेखि सञ्चालन भएर अपराह्न ४ बजे कार्यक्रम समापन हुनेछ । सम्मेलनमा द आमिन वर्शिप टिमले आराधनामा अगुवाइ गर्नेछ । आयोजकले सम्मेलनमा चर्चका पास्टर अगुवाहरू, बाइबल कलेजका विद्यार्थीहरू, बालसंगति शिक्षक शिक्षिकाहरू तथा मण्डलीका सदस्यहरूलाई सहभागी हुन हार्दिक अपिल समेत गरेको छ । सम्मेलनमा प्रति व्यक्ति दर्ता शुल्क रु.१०० छ भने सम्मेलनमा खानाको व्यवस्था समेत गरिएको जनाइएको छ ।